Luis Buñuel

Tot ye permitiu y cosa ye verdat seguntes a obra de Luis Buñuel. Con o film Un chien andalou, iste director aragonés causó sensación en 1929 en París, en a que contó con a colaboración d'o pintor catalán Salvador Dalí. A cinta incluye una d'as escenas mas esgarrifosas d'a historia d'o cine: un fina boira que cubre una luna plena da paso a un uello tallau por una novalla d'afaitar. Buñuel con ista inchenyosa metafora tractaba de destruyir a confianza en a veracidat d'o que o uello veye. Asombró y escandalizó a cinta y contina estando a declaración surrealista por excelencia. A ista le siguió L'âge d'or o 1930, muito mas apostolica, sobre tot en o suyo ataque a la ilesia de Roma.^[2]

A Guerra Civil Espanyola le obligó a exiliar-se en Mexico, an se conformó, con subvaloraus melodramas en os cuals o surrealismo ye superau por a crueldat d'a vida mesma. En tornar ta Espanya, Buñuel rodó Las Hurdes, tierra sin pan (1933), un documental sobre a vida rural en una zona aislada d'o país.^[2]

Con Viridiana (1961), Buñuel trucó l'atención d'o publico internacional. O film fació furor por os suyos contenius, que se creyeban blasfemos. O suyo estilo se convirtió en o modelo pa la carrera ya agorrenca de Buñuel, que se centró en l'absurdo d'as ceremonias cutianas y os vanos esfuerzos d'a burguesia por mantener a dignidat.

A la fosca y austera Le journal d'une femme de chambre (1964) le siguió Belle de jour (1967), a suya cinta mas retuerta. En ella un analisi freudiano fa conectar o deseyo sexual con o capitalismo. Le charme discret de la bourgeoisie (1972) satiriza a solideza d'as rutinas, as chicotas mentiras y os enganyos habituals en as relacions educadas. Encara que esclate a revolución, os convidaus a la cena prefieren a conversación sofisticada a la inconvenient realidat.^[2]

As dos zagueras cintas de Buñuel, Le Fantôme de la liberté (1974) y Ese oscuro objeto del deseo (1977), son talment as mas perversas. A primera exposa a banalidad d'a violencia; a segunda explica a fascinación d'os surrealistas por o fetichismo. A Buñuel se l'ha acusau muitas vegadas d'enganyar, mesmo en a suya autobiografia, pero siempre acaba imposando-se o suyo sentiu de l'humor sobre a suya falta de sinceridat.^[2]

Buñuel recibió en 1978 un Premio Ariel d'Oro de l'Academia Mexicana d'Artes y Ciencias Cinematograficas. Tamién recibió dos Premios Ariel a o Millor Director (en 1951 por Los olvidados y en 1956 por Robinson Crusoe y estió finalista en 1953.

•   Se veigan as imáchens de Commons sobre Luis Buñuel.
• (en) Luis Buñuel en IMDb.