Divisa

 

Os diners como moneda han teniu o suyo protagonismo en o desenvolique d'as civilizacions basadas en o comercio dende fa cuantos milenios.

A tradición d'os cambistas va unida a la aparición d'os diners y d'a banca unidas a o comercio, como verdadero propiciador d'a profesión. Serán aspectos que iran chuntos mientres muitos sieglos. En especial, talment, será en a Europa medieval a on en a suya epoca d'explendor muitas ciudaz prencipien a cudir a suya propia moneda y asinas se prencipie a detectar una profesionalización d'iste treballo.^[5]

Será en o zaguer tercio d'o sieglo XIX, con l'aparición d'o patrón oro^[6] y d'a Unión Monetaria Latina^[7], cuan se estableixcan oficialment as primera paridaz reguladas entre as divisas de cada país. O primero, en muitos casos, no sería de facto albandonau dica 1914^[8].

En o período d'entreguerras ya no se pudo tornar a restaurar o sistema, entre muitas atras razons, por que muitas economías s'amuestraban fuertement desetabilizadas y porque a producción d'oro yera escasa^[9]. En a decada de 1920, poco antis d'a Gran Depresión de 1929, yeran treinta y cuatro países os que heban adoptau o nuevo Patrón Cambeos Oro^[10][11] . Con a crisi, mientres a decada de 1930, as condicions en Europa no amillorarían fendo que cuantos países albandonasen o Patrón Oro^[12].

Caldría asperar a zaguerías d'a Segunda Guerra Mundial, a 1944, pa que se sinyasen os Alcuerdos de Bretton Woods d'os que surtirán o Fundo Monetario Internacional y o Banco Mundial con a finalidat de lograr a estabilidat d'os cambeos de divisas^[13]. Como consecuencia d'a Guerra de Vietnam, se crebarán os alcuerdos en 1971. Dimpués de 1976, y d'a desaparición d'o sistema de cambeo fixo, o FMI prene un papel prencipal debant de países en desenvolique y crisis financieras internacionals.

As divisas fluctúan entre sí adintro d'o mercau monetario mundial. D'ista traza, se pueden estableixer distintos tipos de cambeo entre divisas que varían constantement en función de cuantas variables economicas como o creiximiento economico, a inflación, o consumo interno d'una nación, etc.

A relación d'o pre d'a moneda d'un país con respecto a atras, tamién dita cotización, pende d'os fluxos comercials y financiers entre os residents d'a zona d'ixa moneda con respecto a los d'as atras. As importacions de biens y servicios y a inversión en o estranchero determinan a demanda en divisas extracheras, mientres que as exportacions de biens, servicios y a inversión forana determinan a oferta d'a divisa estranchera en o puesto a on se trobe.

As divisas mas comunas que circulan en os mercaus internacionals son:^[14] o dólar estausunidense, l'euro, o yen, a libra esterlina, o dólar australiano, o franco suizo, o yuan chino y o dólar canadiense.

• Historia d'os diners
• Simbolo monetario
• Cambista
• Cotización
• Mercau de divisas
• Tasa de cambeo
• Risgo de cambeo