Pedro Arnal Cavero

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Pedro Arnal Cavero
Información personal
Calendata de naixencia	12 de marzo de 1884
Puesto de naixencia	Belver de Cinca (Baixa Cinca, Uesca, Aragón)
Calendata de muerte	27 d'abril de 1962
Puesto de muerte	Zaragoza (Comarca de Zaragoza, Zaragoza, Aragón)
Ocupación	Escritor y mayestro

Pedro Arnal Cavero (Belver de Cinca, Baixa Cinca, 12 de marzo de 1884, Zaragoza, 27 d'abril de 1962) estió un escritor y mayestro aragonés, conoixiu por os suyos escritos en aragonés semontanés y os suyos treballos arredol l'aragonés, y os costumbres y tradicions de l'Alto Aragón.

Encara que naixiu de Belver de Cinca, a suya familia se tresladó, bels pocos meses dimpués, enta Alquezra, a on fue destinau su pai, que yera mayestro. Estudió machisterio en Uesca y en Zaragoza, y dimpués d'aprobar as oposicions, estió mayestro en Artaxona, Teruel, Santander y Zaragoza^[1], a on dirichió os grupos escolars "Santa Marta", dende 1921, y dimpués, dende 1929, fue director d'o Grupo Escolar Joaquín Costa". Conoixió as nuevas tendencias pedagochicas mercés a os suyos viaches ta l'extrachero, y a suya fayena docent estió bien reconoixida.^[1][2] Fació parte, entre atras d'entidaz como a Institución Fernando el Católico, o Estudio de Filología de Aragón, Montañeros de Aragón, a Sociedad Aragonesa de Protección a los Animales y Plantas, y o Sindicato de Iniciativa y Propaganda de Aragón, y fació parte d'a directiva d'o Reyal Zaragoza^[1][2]. Dimpués d'adedicar a suya vida a l'amostranza, se chubiló en 1954, y feneixió en Zaragoza lo 27 d'abril de 1962.

En haber creixiu y viviu en Alquezra por muitos anyos, Pedro Arnal Cavero yera un buen conoixedor d'a cultura tradicional aragonesa, a luenga aragonesa d'o Semontano, y os costumbres, tradicions, cuentos, leyendas y refrans d'os lugars semontaners.^[2] Encara que dimpués vivió luent d'a zona de parla aragonesa, mantenió l'interés por a luenga y a cultura d'ixas redoladas. Ista afición li levó a recorrer l'Alto Aragón y a divulgar a suya luenga y cultura, escribindo sobre ella y mesmo amostrando-la a os suyos alumnos de Zaragoza^[2] .

Ye por isto que as suyas obras son fundamentals pa conoixer l'Aragonés d'o Semontano de Balbastro y de puestos cercanos como lo sud de Sobrarbe u de l'Alto Galligo. Ye especialmén interesan debiu a que n'ixas añadas a Fabla Aragones teneba prou vitalidá y pureza.

• Pedro Arnal Cavero. Aragón en alto. Zaragoza, Imprenta Heraldo de Aragón. 1940.
• Pedro Arnal Cavero. Vocabulario del alto-aragonés (de Alquézar y pueblos próximos). Madrid, CSIC, 1944. Se puede consultar a reedición publicada en a revista Archivo de Filología Aragonesa, LXIII-LXIV. 2007-2008, pp. 259–295 (reedición y estudio por Rosa María Castañer).
• Pedro Arnal Cavero. Refranes, dichos, mazadas… en el Somontano y montaña oscense, Zaragoza, Institución “Fernando el Católico”. 1953.
• Pedro Arnal Cavero. Aragón de las tierras altas. La montaña, el Somontano, la tierra baja, Zaragoza, Editorial Heraldo de Aragón. 1955.
• Pedro Arnal Cavero. Por los seres indefensos, Zaragoza, Tip. La Académica. 1960.
• Chusé María Guarido: Pedro Arnal Cavero y l’aragonés, Fuellas, Consello d’a Fabla Aragonesa, pp. 4–5. 1985.
• Víctor Juan. Pedro Arnal Cavero, un maestro que apenas Pedro se llamaba, Barbastro, Centro de Estudios del Somontano de Barbastro. 1998.
• Alberto Gracia Trell: El pensamiento de Pedro Arnal Cavero en torno a la lengua aragonesa, Rolde, 140, pp. 4–19. 2012.

1. ↑ ^{1,0 1,1 1,2} (es) Articlo "Pedro Arnal Cavero" en a Gran Enciclopedia Aragonesa
2. ↑ ^{2,0 2,1 2,2 2,3} (es) Alberto García Trell. "Pedro Arnal Cavero: una figura clave e imprescindible de la cultura aragonesa". en Ambista.