Statik

Dä Artikel behandlet d Statik as Däilgebiet vo dr Mechanik. Für anderi Bedütige vom Begriff Statik lueg doo.

D Statik isch e Däilgebiet vo dr Mechanik, wo sich mit em Gliichgwicht vo Chreft an Körper befasst. Für dass e Kürper, wo in Rue isch oder sich ooni Beschlöinigung bewegt, in Rue blibt, bzw. sich witer ooni Beschlöinigung bewegt, müesse d Summe vo alle Chreft und Momänt, wo uf dä Körper wirke, Null sii. Das isch d Gliichgwichtsbedingig vo dr Statik. Wenn d Chhreft und d Momänt, wo aagrife, bekannt si, cha mä die reagierende Uflaagerchreft und d Chreft und d Momänt, wo im Körper inne wirke, bestimme. D Ermiddlig vo de Chreft und Momänt isch d Grundlaag drfür wie Bauwärk und Baudäil usgläit und dimensioniert wärde.

D Statik isch e wääsentligs Fachgebiet in de ääscheniöörwüsseschaftlige Fachrichdige Bauääscheniöörwääse (Baustatik) und Maschinebau. Si beschäftigt sich under anderem mit em Middelpunkt vo de Chreft und em Schwerpunkt, dr Riibig, em Begriff vo dr Arbet, dr Bestimmig vo dr Schnittgröössi, dr Berächnig vo dr Verformig und dr Stabilideet. Die Brobleem wärde mit Hilf vo grafische und rächnerische Methode glööst. Näbe de klassische analütische Methode wird immer mee die numerischi Finite-Elemente-Methode aagwändet.

D Stifhäit (Stifigkäit), wo dr Widerstand vom ene Körper gegen e elastischi Verformig dur e Chraft oder e Dräimomänt isch, hänggt vo de Äigeschafte vom Material und vo de Abmässige ab und wird im Allgemäine in dr statische Rächnig berücksichdigt. Dr Satz vo dr Erhaltig vo dr Energii spiilt do mit, so muess bin ere langsame Beweegig alli Arbet, wo dur Belastige vo usse ufbrocht wird, im elastische Süsteem dinne as potenzielli Energii gspiicheret wärde.

D Festigkäit, wo im Allgemäine nume e Materialäigeschaft isch, isch in dr äigentlige statische Rächnig dorum nid relevant. Allerdings muess mä, wemm mä mit de statische Rächnige fertig isch, im Allgemäine no brüefe, öb d Festigkäit für d Belastig, wo mä usgrächnet het, grooss gnueg isch.

• R. Mahnken: Lehrbuch der Technischen Mechanik – Statik. 1. Aufl. Springer, Berlin 2012, ISBN 978-3-642-21710-4
• R. C. Hibbeler: Technische Mechanik 1 - Statik. 10., überarbeitete Aufl. Pearson Studium, München 2005, ISBN 3-8273-7101-5
• Ya. G. Panovko: Elements of the applied theory of elastic vibration. Nauka, Moskau 1990

 Commons: Statik – Sammlig vo Multimediadateie

Dä Artikel basiert uff ere fräie Übersetzig vum Artikel „Statik_(Physik)“ vu de dütsche Wikipedia. E Liste vu de Autore un Versione isch do z finde.