Charles Aznavour

Dr Charles Aznavour (aaloose^ⓘ/?; äigentlig Schahnur Waghinak Asnawurjan, armenisch Շահնուր Վաղինակ Ազնավուրյան / Šahnowr Vałinak Aznavowryan, au Charles Aznavourian; * 22. Mai 1924 z Bariis; † 1. Oktober 2018 z Mouriès, Frankriich) isch e armenisch-franzöösische Schaasonnier, Liedtexter, Komponist und Filmschauspiiler gsii. Usserdäm isch er dr armenisch Botschafter in dr Schwiz und bi de Veräinte Nazioone z Gämf gsii.^[1][2][3]

Dr Aznavour het mee as es halbs Joohrhundert zu de bekanntiste Persönligkäite vom franzöösische Schaasoo ghöört. Dr Durchbruch isch em 1946 glunge, wo d Édith Piaf uf in ufmerksam worde isch und in uf e Turnee dur Frankriich und die Veräinigte Staate mitgnoo het. Dr Charles Aznavour het mee as duusig Schaasoo gschriibe und sä in fümf Sprooche, drunder au Dütsch interpretiert.

D Teggst vo sine Lieder handle vilmol vo dr Liebi. E baar vo sine bekanntiste Lieder si La Bohème, La Mamma, Que c’est triste Venise, She, Mourir d’aimer, Paris au mois d’août, Je m’voyais déjà, Les Comédiens, Tu t’laisses aller, Emmenez-moi, Comme ils disent, Pour faire une jam.

As Schauspiiler het dr Aznavour in mee as sibzig Film mitgspiilt, under anderem 1979 in dr Verfilmig vo Die Blechtrommel vom Volker Schlöndorff und 2002 in Atom Egoyan sonere Reflexioon über Künstler, Erinnerig und die armenischi Gschicht Ararat. Si letscht Rolle het er 2006 in The Colonel gspiilt. Er het denn gsäit, er wurd käini witere Film dräije.^[4]

Sit Juni 2009 isch dr Aznavour z Gämf dr armenisch Botschafter in dr Schwiz gsii. Usserdäm het er sis Land an dr Gämfer Niiderlassig vo de Veräinte Nazioone verdrätte.

• 1960: Schießen Sie auf den Pianisten (Tirez sur le pianiste)
• 1960: Taxi nach Tobruk (Un taxi pour Tobrouk)
• 1962: Horace 62
• 1965: Paris im Monat August (Paris au mois d’Août)
• 1972: Der selbstsüchtige Riese (d Stimm vom Vrzeler)
• 1974: Ein Unbekannter rechnet ab (And Then There Were None)
• 1976: Auf der Fährte des Adlers (Sky Riders)
• 1979: Die Blechtrommel
• 1980: Teheran 43 (Тегеран-43)
• 1981: Der Zauberberg
• 1982: Die Fantome des Hutmachers (Les fantômes du chapelier)
• 1984: Es lebe das Leben (Viva la vie)
• 2002: Ararat
• 2002: The Truth About Charlie

 Commons: Charles Aznavour – Sammlig vo Multimediadateie

• Charles Aznavour in de Internet Movie Database (änglisch)
• Aznavour Charles Aznavour bi Discogs (änglisch)
• Offizielle Webpräsenz von Charles Aznavour (eng., frz.)
• „At 82, Charles Aznavour Is Singing a Farewell That Could Last for Years“, New York Times, 18. Septämber 2006

1. ↑ Chansonnier ist Botschafter in der Schweiz. In: tagesanzeiger.ch. 12. Februar 2009, abgruefen am 8. Dezember 2012. 
2. ↑ Embassy of the Republic of Armenia in the Swiss Confederation. Archiviert vom Original am 29. April 2011; abgruefen am 8. Dezember 2012. 
3. ↑ UN Offices at Geneva. Archiviert vom Original am 16. Mai 2012; abgruefen am 8. Dezember 2012. 
4. ↑ Interview 2008, FAZ

Dä Artikel basiert uff ere fräie Übersetzig vum Artikel „Charles_Aznavour“ vu de dütsche Wikipedia. E Liste vu de Autore un Versione isch do z finde.