Ampsivarier

Dr Stamm vo de Ampsivarier (Amsivarier, germanisch „Ems-Manne“) isch e germanische Stamm an der Ems im hütige undere Emsland gsi, wo vom Tacitus as dr südlig Nochber vo de Friese erwähnt worde isch.

Sit ass dr Drusus im Johr 12 vor dr Ziitwändi in dr Gegend acho isch, si d Ampsivarier mit Rom verbündet gsi, hai aber im Johr 9 noch dr Ziitwändi bim Ufstand vom Arminius mitgmacht. Dr Germanicus het si drfür bestroft. Währed dr Regierigsziit vom Kaiser Nero (noch 59) si si vo de Chauke verdriibe und vo andere germanische Stämm zum grösste Deil ufgriibe worde. In dr Mitti vom 4. Johrhundert schiint s, ass dr Räst vo de Ampsivarier zu de Franke ghört het: Dr spotantiki Gschichtsschriiber Sulpicius Alexander erwähnt d Ampsivarier im Rahme vo Kampfhandlige zwüsche de Römer und de Franke am Ändi vom 4. Johrhundert.

• Reinhard Wenskus: "Amsivarier". In: Reallexikon der Germanischen Altertumskunde. Bd. 1, S. 257.

Dä Artikel basiert uff ere fräie Übersetzig vum Artikel „Ampsivarier“ vu de dütsche Wikipedia. E Liste vu de Autore un Versione isch do z finde.