Occident
| Occident | |
| |
| Leier | Pierre Sidos (1964 - 1965) |
|---|---|
| Gestig | April 1964 |
| Ontbind | 31 Oktober 1968 |
| Opgevolg deur | Ordre Nouveau (1969-73) |
| Ideologie | Fascisme en Franse nasionalisme |
Occident was in die tydperk tussen 1964 en 1968 'n verregse politieke beweging in Frankryk, wat dikwels ook as fascisties beskryf is. 'n Aantal lede van die groep het later bekende lede van regse politieke hoofstroompartye geword en selfs ampte as ministers beklee.
Die groep, wat in 1964 deur Pierre Sidos gestig is, het hoofsaaklik studente as lede gewerf. Occident was uitgesproke anti-kommunisties[1], maar het tegelykertyd ook die regering van president Charles de Gaulle skerp aangeval en nou saamgewerk met die pieds-noirs, die Franse setlaars in Algerië. Die pieds-noirs het De Gaulle daarvan beskuldig dat hy hulle belange uitverkoop het.
Ná 'n aantal gewelddadige konfrontasies in Mei 1968, die maand waartydens die politieke onluste in Frankryk 'n hoogtepunt bereik het, is Occident deur die owerhede onwettig verklaar en ontbind. Baie van Occident se lede het by nuwe verregse groeperings soos Groupe Union Droit aangesluit.
Occident en die groeperings wat hom opgevolg het, maak almal gebruik van 'n Keltiese kruis as hulle simbool.[1]
Verwysings
[wysig | wysig bron]- ↑ 1,0 1,1 Shields, James (7 Mei 2007). The Extreme Right in France: From Pétain to Le Pen (in Engels). Routledge. p. 139. ISBN 9781134861118.
Bronne
[wysig | wysig bron]- Charpier, Frédéric (2005). Génération Occident. Le Seuil. ISBN 978-2020614139.
- Shields, J.G. (2007). The Extreme Right in France. Taylor & Francis. ISBN 978-0-415-09755-0.