遊戲平衡

遊戲平衡（粵拼：jau4 hei3 ping4 hang4；英文：balance）係遊戲設計上嘅重要概念，指一隻遊戲每個子系統（角色或者武器等）都要同同類嘅子系統差唔多咁勁。如果有某啲角色或者武器勁過同類好多，就會造成玩家一味淨係揀用嗰啲勁嘅角色武器，破壞隻遊戲嘅多樣性同遊戲性^[1]。

• OP：英文 overpowered 嘅簡寫，指遊戲當中嘅某個角色、武器、或者異能太強大，搞到玩家冇誘因用第啲角色、武器、或者異能；如果係多人遊戲，會造成玩家個個都揀用同一個角色、武器、或者異能對局嘅效果－遊戲設計師一般會想玩家多啲試用唔同嘅角色、武器、同異能，而唔係淨係用死一兩個^[1]。
• IMBA：Imbalanced 嘅簡寫，指隻遊戲平衡得唔好，有某啲角色武器異能 OP 嘅情況^[1]。
• Nerf：指調整一個勁得滯嘅子系統，等佢冇噉 OP；例如喺一隻射擊遊戲當中，可能有某枝槍 OP（網上多人遊戲模式裏面個個玩家都用呢枝槍，唔肯用其他槍），於是製作組就改改個遊戲程式，減低枝槍嘅火力或者彈匣大細等^[1]。
• Buff：指調整一個弱得滯嘅子系統，等佢能夠拍得住同類；例如喺一隻格鬥遊戲當中，可能有某個角色弱得滯（數據顯示，揀用呢個角色打贏嘅機會率零舍低），於是製作組就改隻遊戲嘅程式，提高呢個角色啲攻擊嘅殺傷力、行嘅速度、或者血量等^[1]。
• 威力膨脹（power creep）：指啲遊戲嘅子系統（角色同武器等）隨住時間而威力提升嘅現象。喺幫一隻遊戲出新嘅版本或者資料片嗰時，製作組好多時會加入新嘅角色同武器；喺好多遊戲當中，為咗吸引玩家俾錢買呢啲新角色同武器，呢啲新角色同武器會勁過舊嗰啲。經過若干個資料片之後，初頭出嗰啲角色同武器就完全唔夠新角色武器嚟，變到冇人用－呢種情況就係所謂嘅威力膨脹。有好多遊戲設計師都會想避免佢哋設計嘅遊戲有威力膨脹，希望新角色新武器做嘅嘢係增加隻遊戲嘅多樣性（而唔係一味用嚟引玩家使錢）。呢啲設計師主張，新角色新武器要免費，而隻遊戲要用第啲方法搵錢（睇埋電子遊戲搵錢方法）^[2][3]。

難度水平係好多遊戲都有嘅一種機制，指隻遊戲俾玩家揀遊戲有幾難。

• 已解遊戲
• 佔優策略，有一種諗法話，如果一隻遊戲平衡得好，就表示佢冇一套簡單嘅佔優策略，唔會話個個都爭住揀某一個角色或者某一件裝備^[4]。