曹髦

曹髦（髦讀無，粵拼：cou4 mou4；241年11月15號—260年6月2號），字彥士（jin6 si6），係三國時期曹魏第四位皇帝，254年到260年在位。佢死後無任何諡號，史稱高貴鄉公（gou1 gwai3 hoeng1 gung1）。

254年，司馬師廢咗23歲嘅皇帝曹芳，準備立曹操嘅仔，彭城王曹據做皇帝。郭太后表示曹據係佢（丈夫）嘅亞叔，如果由曹據繼位，就會免除佢嘅太后之位，因此司馬昭搵咗曹丕嘅孫仔，高貴鄉公曹髦做皇帝，作為佢無仔嘅亞伯曹叡嘅後嗣^[1][2][3]。曹髦繼位後，朝廷由司馬師控制，司馬師過世後，朝廷由佢細佬司馬昭控制。曹髦大個後開始唔滿意司馬昭嘅專權，因此作咗一首《潛龍詩》嚟表達自己嘅不滿，司馬昭知道後對曹髦起咗戒心^[4]。

甘露五年五月，曹髦召見王沈、王經同王業，向佢哋展示廢黜司馬昭嘅詔書，並且講道：「司馬昭之心，路人皆知！，我哋唔可以坐以待斃。」。王沈同王業將件事話咗俾司馬昭知，司馬昭叫賈充準備入宮鎮壓。曹髦知道事情曝露後，帶住幾百個僮僕攻打司馬昭嘅屋企^[5]。司馬昭嘅細佬，屯騎校尉司馬伷係東門遇到曹髦，但係佢嘅手下被曹髦喝退。賈充係南闕遇到曹髦，太子舍人成濟係賈充嘅指示下用劍將曹髦殺害^[6]。之後，司馬昭假借郭太后嘅名義下韶，以民禮將曹髦落葬^[7]，喺司馬孚呢啲重臣嘅請求下，以王禮將曹髦葬喺洛陽西北三十里嘅瀍澗之濱^[8]。雖然話喺以王禮埋葬，但喺葬禮連旌旗都冇，連幫《三國志》作注嘅裴松之都話呢個唔喺以王禮埋葬。葬禮嗰日有好多人去睇，有人話道：「呢個就喺前日畀殺嘅天子。」有人甚至掩住個面喺度喊，悲傷到無法自拔^[9]。由於輿論壓力，司馬昭喺事發二十日之後將弒君嘅罪狀全部賴畀成濟，話成濟違背自己嘅命令將曹髦殺咗，以「大逆不道」嘅罪名殺咗成濟成族人^[10]。司馬昭之後扶植燕王曹宇嘅仔曹奐嚟做皇帝。曹髦擅長寫詩文，佢嘅繪畫藝術亦都相當唔錯，喺一位琴棋書畫都好叻嘅才子。