文言文

文言（粵拼：man4 jin4）係中國一種書寫文體，源自甲骨文同金文，用來記事。文言經歷幾千年演變，唔同時期文法同用字都有明顯分別。

二十世紀之前，文言幾乎係東亞各國嘅通用文體。中國喺新文化運動之後，以中國國語普通話為基礎嘅白話文，因為政府力推，慢慢取代咗文言文。除咗中國之外，其餘嘅國家都推行自己嘅國語，唔再用文言文。

同標準官話白話文（現代中國語文）相比，文言言簡意賅。

香港中國語文科，小學生已經要學文言文，中學生要讀得深入啲。

廣東話保存咗唔少文言文嘅字詞。例如：

• 「粵語音韻來自秦漢，語彙上溯先秦，大者來自唐宋，…粵語語法有先秦特色，如雙賓語語序^[1]…」
• 「粵語人寫通用中文，便要寫『做此等事，當心人頭落地』，與宋人白話無異^[2]。」
• 粵語保留好多古代漢語嘅用字^[3]，例如「靚」（「衣冠士女……莫不靚^{[註 1]}妝麗服」，明代《虎丘記》）、「幾時」（「明月幾時有」，宋代《水調歌頭》）

香港文壇曾經流行白話文、文言、廣東話嘅混合，三及第同文白夾雜（白話文加文言）。至今仍有少數作者鍾意用呢種風格寫作^[4]。

香港粵劇﹑粵曲﹑粵語流行曲以至小說家金庸嘅武俠小說作品用文白夾雜型式寫。

日本自從中國唐代文化交流，到片假名平假名普及後好多年，公函文書、碑文、經文…好多重係用漢字文言。稱之為漢文（かんぶん，Kanbun）。

喺韓國，文言文叫漢文（한문，Hanmun）。

喺越南，文言文叫儒字（亦叫字儒，Chữ Nho）。

• 文言虛字
• 三及第
• 雙層語言
• 新文學運動