實驗心理學

實驗心理學（粵拼：sat6 jim6 sam1 lei5 hok6；英文：experimental psychology）係指用實驗－即係所謂嘅心理實驗－方法嚟研究心理學嘅做法^[1][2]。

有心理學家試過評估心理學研究常用嘅行為量度法，指出行為量度法可以分做三大類^[3][4]：

1. 行為痕跡，量度行為過後留低嘅痕跡－例如做智商測驗，睇吓一個人嘅答問題行為（呢種行為源於佢嘅智能）留低嘅答案（痕跡），用答案所出嘅分數做評估；
2. 行為觀察，直接目擊同觀察個行為，並且作出一啲量度－例如用攝影機影低啲受試者嘅行為，打後再人手數吓每個受試者做咗一個行為（假設研究者對個行為有明確嘅定義）幾多次；
3. 行為選擇，俾受試者作出選擇－例如要受試者玩一場博弈（睇埋博弈論），俾佢哋分錢，再睇吓受試者會唔會喺某啲情況下零舍傾向分多錢俾自己。

舉個例說明，自由回想係記憶研究上常用嘅一種實驗方法：喺自由回想測試當中，個研究者會要求個受試者睇一柞字，跟住喺一段時間之後，再叫佢哋盡可能有咁多得咁多噉寫返嗮佢睇咗嗰柞字出嚟。一般嚟講，如果一個受試者對某個字嘅記憶愈強，佢應該愈有可能會記得寫返低嗰個字，而研究者可以做各種量度同操作，睇吓人嘅記憶力會受乜嘢因素影響^[5]。用呢個方法做嘅研究發現咗廿世紀心理學上好出名嘅系列位置效應－喺回想一串資訊嗰陣，人零舍有可能會記得嗰串資訊最先出現嗰啲同最後出現嗰啲^[6]。

心理實驗被指好似遊戲設計上嘅研究。想像以下一份噉嘅研究^[7]：

• 研究者搵咗若干個受試者返嚟，俾佢哋先後玩咗兩隻電子遊戲。喺佢哋玩遊戲嘅同時，研究者量度咗佢哋嘅心跳率，而佢哋玩完之後，研究者就問佢哋鍾意邊隻遊戲多啲。最起始嘅數據係一個個嘅向量，每個向量都係一個時間序列－即係一列 ${\displaystyle H_{t}}$，每個 ${\displaystyle H_{t}}$ 表示時間點 ${\displaystyle t}$ 嘅心跳率；
• 然後個研究者轉化訊號，由 ${\displaystyle H_{t}}$ 嗰度計出一柞指標，包括
  • 平均心跳率，${\displaystyle E(H)}$；
  • 心跳率嘅變異數，${\displaystyle \sigma ^{2}(H)}$；
  • 最大心跳率，${\displaystyle \max({H})}$；
  • 最細心跳率，${\displaystyle \min({H})}$；
  • 心跳率嘅熵，即係心跳率「有幾難預測」，反映呢個數嘅係「兩個喺過去 ${\displaystyle m}$ 個時間點都相似（差異細過某個特定數值）嘅數據，喺下個時間點都相似」嘅機會率。

... 等等。然後佢哋再做統計分析，發覺呢柞指標多數都同「玩家有幾鍾意隻遊戲」有顯著嘅相關，所以呢類指標可能會喺遊戲測試上有用。於是呢班研究者就算係發現咗一啲有用嘅資訊，可以將佢哋嘅研究成果喺學術期刊公佈^[7][8]。

• 實驗
• 統計
• 心理學
• 認知科學

• Boring, Edwin G. (1950). A History of Experimental Psychology (2nd ed.). Prentice-Hall.