夏 (先秦)

請撳 Wikipedia:翻譯/夏 (先秦)，去整翻譯請求。(翻譯指引)

夏
首都	都城不定，各王相異
君主  -開國君主  -亡國君主	共16位 啟 桀
成立	(禹傳畀啟（有爭議）)
滅亡	(鳴條之戰)

夏（約前2000年—約前1600年），又叫夏國，係中國古國。跟斷代史嘅話，叫夏朝或者夏代。中國史書，記夏承虞，最後俾商滅咗。夏周圍有萬國，以夏爲首，結成部落聯盟。現時無考古文字確證，夏曾存在世上，但仍會按商前嘅考古發現，當係夏代各國遺物。夏朝文物，西元前一千六百年以前嘅文物，有唔少青銅同玉製嘅禮器，文化同文明程度，高過新石器後期文化。雖無確證，亦難否認夏存在過。若然有文字，而寫喺易敗壞之物上，都可能流傳唔到，只能口耳相傳及日後記載。商就係甲骨同埋青銅器文字，是爲確證。史書記載「禹時五星累累如貫珠，炳炳若連璧。」天文計算，西元前1953年2月26號，有一次好好嘅五星聚會，係夏代紀代參考。

史書記載，聯盟領袖，夏國嘅禹，傳畀個仔啟續承。聯盟以夏國君主爲首，唔再禪讓，改為世襲。夏傳十三世，十六王（一說14代、17王，主要係大禹係君主定係部落聯盟首領呢個有爭議嘅問題），大概四百年後，俾商國所滅。

按照考古學嘅標準，夏不能確認，或者話，嚮有力嘅文物出土之前，諸如證明商朝存在嘅甲骨文，學術上唔承認夏。之所以有夏，可能係後人記錄或杜撰。華人傳統觀念，雖則未文字考古實物，會視夏係真有其事。但從考古學嘅角度來睇，就唔夠嚴謹。不過另一批西方史學家，批評中國史學、考古學界，過於疑古，低估傳說同神話於史學用處。據中國社會科學院考古研究所殷瑋璋教授所講，由於流傳至今，夏時史料，非常匱乏，史上有冇夏，畀好多人懷疑。但係《史記》，《夏本紀》記載有夏國世系，而同一書《殷本紀》記載商國世，兩者同樣明確，商世系嚮安陽殷墟出土嘅甲骨卜辭中，得到證實，可推斷《夏本紀》中所記夏世系，多數學者認爲可信，而商在此之前，就同夏一樣，係不爲主流睇法接受。咁樣，考古學家，見安陽殷墟、鄭州商城等商嘅物質文化遺存，深入認識後，再探索夏文化，希望用考古手法，揾到夏代嘅物質文化遺存，進而恢復夏代史。

目前河南偃師二里頭文化，發現宮城，距今三千六百年，面積達十萬八千平方米，比起附近偃師，商國都城，面積大好多，重發現咗距今三千七百年嘅車轍，係同史書中夏代同時代嘅文物。中國政府已專門撥款，開始夏商周斷代工程，用力研究夏代。學術界對二里頭文化，有兩種睇法，一種認為二里頭文化一至四期，都係夏文物，宮城係夏都；另一種認為，一二期係夏朝文物、三四期係商文物，宮城係商都。今下為止，夏都城考古實據，未能確認，現時夏僅存在於古代文獻中。

徐旭生為等古史學家，依據文獻資料，提出有兩個地區，可能係夏人活躍，一係河南西部嵩山，附近嘅登封、禹州同埋洛陽平原；另一係山西南部嘅汾水下游。傳說中夏都邑同一啲重要嘅歷史事件，大多同呢個兩地有關。一九五九年開始調查「夏墟」，拉開咗夏文化探索嘅序幕。四十年來嚮豫西、晉南，一直有做考古調查同發，令夏文化探索嘅目標，日漸縮細。目前，多數學者認為，以偃師二里頭遺址命名嘅二里頭文化，包括二里頭類型同埋東下馮類型，同埋豫西地區嘅龍山文化，係探索夏文化嘅主要對象，並對夏文化問題，發表咗各種睇法。但因為缺乏文字等直接證據，目前學術界對邊種遺存，先係夏文化，重未有共識。不過無論龍山文化，定係二里頭文化，都已經累積咗相當豐富嘅資料，有條件解決呢個問題。

文獻記載，夏之前，夏國部族，同周圍其他部族，時時爲做聯盟首領，爭戰頻繁。夏國大概喺帝顓頊以後，逐漸興起。有唔少古代文獻，都將夏人追溯到帝顓頊。其中《史記》《夏本紀》同埋《大戴禮記》《帝系》，稱禹為顓頊個孫，但有又有文獻話，禹係顓頊嘅五世孫。呢啲文獻表明，夏人好有可能係顓頊部落嘅一支後裔。

夏人鯀，係最早記載一位。《國語》《周語》話鯀係夏人首領，封嚮崇，稱為「崇伯鯀」。之後禹繼承咗鯀，為「崇伯禹」。咁就表明夏人早期活動，喺崇附近。當時黃河泛濫，為咗抵抗洪水，唔少部落形成咗部落聯盟，四嶽推舉為鯀負責治水。治水九年，終告失敗。鯀失敗嘅原因，好有可能係不善於團結族人，與各部落關係不好。《尚書》《堯典》記載，堯最初認為鯀方命圮族、毀敗善類，反對鯀做治水。推斷鯀嚮擔當治水時，唔少部落對佢不滿。《尚書》《洪範》喺《國語》《魯語》中又提到，「鯀障洪水」，話鯀治水嘅方法，主要係用土木堵塞，而最終失敗。錯法或者係失敗原因之一。總而言之，鯀治水失敗後，遭殛死羽山。

禹係鯀個仔。記載中不見禹爲父而怒，反而恭敬舜，得到舜信任。舜就將治水任務交畀禹。禹改進咗佢亞爸方法，團結各部落人，令治水成功。《史記》《夏本紀》記載，禹治水時，「勞身焦思，居外十三年，過家門不敢入」，佢艱苦卓絕嘅精神，後人廣爲歌頌，呢個有可能促進咗各族人團結。《孟子》《滕文公》提到，禹嘅治水方法，「疏九河，瀹濟、漯而注諸海；決汝、漢，排淮、泗而注之江。」

禹治水有功，農業得以大進，夏人勢力增強，成為部族聯盟首領。隨後舜又派禹，討伐三苗。禹將三苗驅趕到丹江同漢水流域，鞏固王權。《墨子》《非攻》中講道，禹克三苗後，「別物上下，卿制大極，而神民不違，天下乃靜。」寫法有少少誇張，但可以講明，禹喺治水同討三苗成功後，夏人已提升到當時黃河流域文化，到前所未有嘅重要地位。舜將帝位禪讓畀禹，禹嚮塗山召集過部落會盟，再次征討三苗。《左傳》記載「執玉帛者萬國」參加咗塗山會盟，可見當時夏人影響力。有一次嚮會稽部落會盟時，防風氏首領遲到，畀禹處死。呢個表明，夏人嚮穩定權力後，開始濫權。黃帝族為核心嘅夏人聯盟，政權日益鞏固，各地經濟，關系同樣加強。文獻中，時有禹畀諸侯部落，以路途嘅遠近，來分納貢，體夏人控制周邊部落經濟。

古代文獻亦屢有描述，禹晚年權勢欲，甚爲強烈。禹雖然想將權力，保持夏人內，但顧慮禪讓傳統，所以佢採取靈活辦法。禹先任命幾有威望嘅有偃氏首領皋陶為繼承人，以表示禹對禪讓傳統嘅尊重。然而皋陶年紀重大過禹，重未等到禪讓，皋陶已經死咗。禹又任命益為繼承人，東夷族首領冇幾多影響力。然而當時好多部落，都唔支持東夷族嘅益，反而相信禹個仔啟。禹認為益得唔到各部支持，必定會禪讓畀佢個仔啟。

禹死後，益並未得到權位，反而嚮民眾嘅擁護下，啟得到咗權位。於是益率領東夷族聯盟討伐啟。經過幾年後，啟殺咗益，確立王位。呢個就係大多數史學家，認為中國嘅第一個世襲制王朝。隨後，重有唔少傾向禪讓傳統嘅部族，質疑啟嘅權位。居於當今陝西省關中平原一帶嘅有扈氏，率領聯盟討伐啟，嚮甘，卽今陝西省戶縣之南，大戰。戰前啟稱佢嘅權位係「恭行天」，呢個就係幾百年後周天子論嘅雛形。啟擁有中原民眾嘅贊同，嚮人數方面佔絕大優勢，最終打敗有扈氏。啟呢兩勝，當時中原社會觀念，從傳統嘅禪讓，轉向世襲。

啟能歌善舞，成日搞盛宴。其中最大嘅一次係嚮鈞台，卽今河南省陽翟，此即鈞台之享，重喺「天穆之野」（位置不詳）表演咗精彩嘅歌舞。《山海經》《海外西經》記載啟跳舞嗰時「左手操翳，右手操環，佩玉璜。」甚至有文獻話啟，曾經上天取樂舞。啟視為中國古老嘅樂舞文獻《九辯》、《九歌》同埋《九招》嘅原作者。

夏人原先姓姒，但從啟開始，改用國名「夏」做姓。同時啟唔再用伯呢個銜號而改用后，即「夏后啟」。

啟統治期間，佢個仔武觀成日作亂。《韓非子》《說疑》話佢「害國傷民敗法」，最終受誅殺。除咗夏氏族內部嘅糾紛，為爭奪方國部落聯盟權威，而成日同東夷族作戰。

啟死後，佢個仔太康繼承咗後位。太康只顧住嚮田野玩，唔理政治，在位期間，夏人權威削弱，東夷族太昊同埋少昊部落趁機西進。東夷族有位善射嘅首領羿。《呂氏春秋》《勿躬》認為弓就係羿發明嘅。羿率軍從東夷屬地鋤遷（同【鋤】音意，左金字旁、右【且】）到咗有夏氏屬地嘅窮石，卽今河南省洛陽南面，同當地夏人通婚，結好關係，形成咗有窮氏。從而令羿嚮夏民嘅擁護下，奪得夏政。隨之太康投奔斟尋嘅斟尋氏。

羿奪得權位後並未稱王，而係將太康嘅細佬中康設為夏后。但事實上，國事全部由羿治理。引起唔少部落不滿。其中主持天象活動嘅有和氏同埋有羲氏公開反對。羿話佢哋廢時亂日，派兵討伐佢哋並且取勝。

中康死後，佢個仔相繼位。隨後，相投奔親夏嘅斟尋、斟灌氏。從此，羿獨承夏后權位。但得權後，羿就好似太康咁，唔再理國事，成日喺野外射獵。佢廢咗武羅、伯困、龍圉等忠臣，但就重用畀伯明氏驅逐嘅不孝子弟寒浞。寒浞網羅黨羽，權力日益增大。終於有一日，佢趁羿出外射獵嘅機會，將羿同佢屋企人殺晒。奪取咗有窮氏嘅大權。寒浞將戈封畀佢個仔「豕壹」（一個字），將遼封畀佢一個仔澆。澆率兵眾滅咗親夏嘅斟灌氏同埋斟尋氏，殺咗嚮斟尋躲避嘅相。相嘅老婆緡嗰時已經有咗相個仔，佢從牆洞避開澆，走到佢阿媽有仍氏屋企避難，冇幾耐就生咗少康。留意，太康、中康、少康均名康，但為咗唔混淆，加注輩分。

少康大咗之後，為有仍氏牧正，結果俾澆知道咗。澆又派人去追殺有仍氏，少康無奈逃奔有虞氏，即舜嘅後代，躲避。有虞氏當時無仔，得兩個女，對少康格外款待。佢哋將綸邑送咗畀少康，少康就以綸邑為根據地，組織兵眾。佢開始收集存餘嘅夏人，設官分職。喺澆廷中設間諜，準備恢復夏朝。呢個時候，喺有鬲氏躲避嘅原夏臣靡聽到少康準備恢復夏室，親自帶領斟灌、斟尋氏殘餘民眾同少康聯合擊敗寒浞。復立少康為夏后。少康又喺過滅澆，又派佢個仔杼喺戈滅「豕壹」*（一個字）。至此，控制中原三世近百年嘅東夷族有窮氏，終於覆滅。太康失國至少康中興表明住，華夏族平定中原方國部落，尤其係東夷族，過程以及最終嘅勝利。

少康結束咗後羿同埋寒浞四十年左右嘅統治，恢復咗夏人政權，史稱「少康中興」。少康死後，佢個仔杼立。佢重視發展武裝同埋製造兵甲。形成咗夏代中興嘅局面。

夏經過較長時間中興穩定，到孔甲時，內部衝突日激。從孔甲經皋同發，到履癸，即夏桀，內亂不止。

夏國後期，特別係最後桀，暴虐無道，俾商族部落首領商湯乘機而入，率大軍同夏軍喺鳴條打過（一說河南中部，另一說山西安邑），即鳴條之戰，夏桀失敗，逃到安巢，卽今安徽巢縣，並死嚮嗰度，夏國亡，商誕生。

夏國疆域，以今日來睇，西起河南省西部同山西省南部，東至河南省、山東省同河北省三省交界處，南起湖北省，北至河北省。當時夏勢力，延到黃河南北，甚至長江流域。夏都有幾個：陽城，卽今河南省登封嘅東部，酌鄩，今河南省登封嘅西北部，安邑，今山西省夏縣西北部等地。

夏國直接來源於部落聯盟，特徵係：

1. 直接管轄範圍，只限於本氏族內。夏族本部之外，其他部落首領嚮自己嘅領地上，享有極爲獨立嘅管理權同統治權。對住夏王，佢哋就以臣服同納貢嘅方式，表示大家關係。
2. 政權形式同管理制度方面，具有專制、民主二重性，制度由氏族民主，過渡至君主政體。

夏人已經掌握天文歷法等知識，《夏小正》即係中國最早曆書。冶鑄銅業，係夏代新興嘅重要手工業。

二里頭一、二期文物中出現玉製禮器，證明佢已經有相當文化水準。

夏代，農業文明到咗好高嘅程度，傳說禹嘅大臣儀狄開始造酒，少康又發明咗秫酒嘅釀造方法。為咗適應農業需要，探索出農事季節嘅規律，現時重流行緊，有時稱為夏曆嘅農曆就係嗰個時代發明。

畜牧業有一定發展。有一大批奴隸從事畜牧工作，重有一啲專門從事畜牧業嘅氏族部落。養馬得到相當重視。

此外製陶業，嚮夏代可能已經成為獨立及極為重要嘅行業。

至於青銅器，中國已經發現咗二里頭文化嘅銅刀。如果二里頭文化視夏文化，咁呢件青銅器就係夏代。夏代人架生，以石器為主。

夏國都城出現咗車，但重未能夠確認係人力車定係馬車，因為車轍只有一米闊，同商兩米闊嘅車轍唔同，商國已經確認用馬車。

禹執政期間，征戰贏苗族，迫佢退到長江流域，從此以後，佔據黃河流域嘅黃炎族，中原地位更加鞏固。禹做共主之前，最偉大嘅功績就係治水。據說大禹吸收亞爸鯀失敗嘅教訓，唔再用圍堵法治水，而用疏導法治理洪水，三過家門不入，終於平水土，定九州。禹重改善咗灌溉工程，有利農業。禹嗰時嘅伯益發明鑿井、奚仲發明造車，禹時用銅做兵器，顯然，禹時生產力大振。據說，禹時開始建城，並由儀狄發明瞭用穀物釀造甜酒嘅方法。呢個表明，當時嘅私有制發展，已經形成階級。禹死後，眾酋長擁戴禹個仔啟，於是廢禪讓，由禹嘅後裔開創嘅夏王朝正式開始。

　1·啟
　　│
　　├─────┐
　　│　　　　　│
　2·太康　　3·中康
　　　　　　　　│
　　　　　　　4·相
　　　　　　　　│
　　　　　　　5·少康
　　　　　　　　│
　　　　　　　6·予
　　　　　　　　│
　　　　　　　7·槐
　　　　　　　　│
　　　　　　　8·芒
　　　　　　　　│
　　　　　　　9·泄
　　　　　　　　│
　　　　　　　　├──────┐
　　　　　　　　│　　　　　　│
　　　　　　１0·不降　　１1·扃
　　　　　　　　│　　　　　　│
　　　　　　１3·孔甲　　１2·廑
　　　　　　　　│
　　　　　　１4·皋
　　　　　　　　│
　　　　　　１5·發
　　　　　　　　│
　　　　　　１6·履癸（桀）

夏（前2054——前1600）

啟 39 己卯 前2054

太康 29 丙戌 前2015

仲康 13 乙卯 前1986

相 28 戊辰 前1973

後羿 2 丙申 前1945

寒浞 38 甲辰 前1943

少康 21 丁丑 前1905

杼 17 戊戌 前1884

槐 26 甲寅 前1867

芒 18 庚辰 前1841

泄 16 戊戌 前1823

不降 59 甲寅 前1807

扃 21 癸丑 前1748

廑 21 甲戌 前1727

孔甲 31 乙未 前1706

皋 11 丙寅 前1675

發 11 丁丑 前1664

桀 53 戊子 前1653

• 《中國大百科全書》夏