一筆畫

一筆畫係只用一筆畫出整個圖形或者字嘅方式，過程中，畫過嘅路線唔可以重複畫，但可以有交點。

每個交點或端點延伸出嘅條線數，如果係單數，噉呢點就叫奇數點或單數點；如果係雙數，噉呢點就叫偶數點或雙數點。

如果個圖有0或2個奇數點，就可以只用一筆畫完。當中如果係0個奇數點(個圖係封閉型)，由邊個位置開始畫都得，而且會結束喺同一個位置；而如果係2個奇數點(個圖係開放型)，就一定要由其中一個奇數點開始畫，最後喺另一個奇數點結束。