Keeper

De keeper is de speler in een voetbalteam die moe zorgn da de teegnstander gin golle kan scoorn. Hem vormt de latste man in de verdedigienge van de golle. Omda zyder dus de latste schoakel zyn, speeln z' een beslissende rolle in et spel en kunn under team loatn verliezn of winn. Keepers zyn mêestal mensn met e grôte posteure omda ze ton mè mêer gemak tot de deklatte kunn springn.

In de volgende sportn wirn ôok keepers gebruukt:

• voetbol en minivoetbol
• hockey en yshockey
• handbal
• woaterpolo en kajakpolo
• lacrosse

En team hèt altyd mo êne keeper in de golle stoan. Mêestal hèt dien ôok numero êen. De keeper hèit olsan nen andre boai an dan de rest va ze team en ze droagn ôok handschoenn vo mêer grip t' èin en kwetseurn te vermydn. Den term keeper komt van in het Ingels goal keeper (de 'bewoaker' van et doel).

De keeper mag allêne moa den bol mè z'n handn anroakn in de klêne carré. Ze droagn ôok olsan een ander kleur van shirt zodat iederêen goe ziet wien dat de keeper is. Ze droagn ôok verre olsan nog handschoenn. At de keeper den bol in d'handn hèt, moet iederêen uut de carré. In profvoetbol moet de keeper den bol uutschippn binn 6 secondn. At ie langer wacht, kan de scheids hem verplichtn den bol of te geevn an 't ander team, moa at de keeper nie expres probeert tyd te verkwistn, kykn ze doa mêestal nie achter. As een team toch tyd wil rekkn komt de keeper mêestol verder en verder uut de carré vo 'n bol by t' oudn moa nie mè gebondn te zyn an de 6 secondn regel.

A ne geweune voetbolspeler den bol past noa de keeper mag diene keeper den bol nie iproapn anders is da en foute. Doet ie da wel ton krygt et ander team nen vryen trap.

In minivoetbol mag de keeper den bol nie teegnhoudn met zyn hand omda et anders veel te makkelik zoe zyn in zukke klêne golle (die ze in minivoetbol gebruukn).

At e team met gemak an 't winn is van een ander team, verveelt de keeper em wel gemakkelik en durvn ze wel e kee vodder uut under golle kommn. 't Hèt ol gebeurd zelfs in d'hôogste klassn dat et ander team ton mè ne gedurfde lopbal kan scoorn, deurda de keeper te verre uut zyn golle stound en verrast werd. Sommige teams moakn ôok underne keeper kapiting (das de leider van et team). Da werd ôok veel gedoan als et team verdedigend goa speeln of vo de keeper te bedankn omda ie zo goe keept.

Keepers kommn soms in upsproake round omkopienge omda zyder een beslissende rolle speeln in et spel en dus under team kunn loatn verliezn of winn. Doarom zoun gokboazn under wel ne kê durvn (probeern) under om te kôopn. Wa da nie wil zeggn dan de keepers et anpakkn. Zyder kunn ôok wel ne kê ne floater begoan, zelfs in profvoetbol. Want byvoorbêeld by ne corner moetn zyder ip en vrê korte tyd beslissn wa da ze goan doen, wa wel de rest van de match kan beslissn. Ôok soms moetn z' achter da ze den bol nog moa zjuste vast èin ol direct deurespeeln zodat under team ne counter-anval kan probeern.

Ôok deurda keepers zuk 'n belangryke rolle speeln weirn ze ôok veel rapper en arter bestraft an ze en overtredienge begoan of e foute moakn. Veel keepers oaln an ze zien da ze echt nie anders kunn nen anvaller geweune nere omdat anders under team zou verliezn. Den scheids ziet da mêestal nateurlik. At er e kanse tot en golle (doelpunt) was ton krygt de keeper rôod, at er gin doelkanse was moa de keeper beging toch en foute ton krygt 'n geel. Uutzonderlik weirdt er ook ne penalty gegeevn in plekke van rôod. De anvallers weetn da nateurlik ôok dan de keepers trefboarder zyn vo gele of rôde koartn dus speeln ze doa ôok ip in deur under te loatn valln an ze zien da ze et nie mè goan oaln of de kanse voorby is. Jou loatn valln en doen alsof da êen van et ander team jou èi nere gesmeetn noemn ze een schwalbe. Zo gebeurde et ôok ip et WK in Duutsland in de match Itoalië-Australië woar da in de latste minute Itoalië nog ne strafschop kreeg deur ne schwalbe en zô de match won en uuteindelik weireldkampioen werd. Der is doa commotie rond gewist, den ênen vond dat 't nie êerlik was da Itoalië azô gewonn ad, d' andere vondn et vrê leep van dien anvaller want et wos ôok et beste dat ie ton nog kost probeern. Veeln die der nie akkôord mee woarn vindn da ze vanaf nu zoun moetn camerabeeldn gebruukn by de beoordelienge van al dan niet overtrediengn en nie allêne wa de scheids gezien èit. In d' herhoalienge was et dudelik te zien da de keeper dien anvaller nie genakt ad en dat ie em geweune ne mèter vodder liet valln.

At et dus gebeurt dat den keeper den latstn nog in de weg stoat vo den anvaller noa de golle komt, komt de keeper dus uut. Da 's vo et doelbereik van den anvaller te verklêenn, want stel dat den keeper nog in ze golle stoat en den anvaller tot ip 2 meters komt, kant ie wel olle kantn uutschietn en kan de keeper noois mè ip tyd reageern. Doarenteegn at de keeper uutkomt èit den anvaller minder tyd vo e goed schot te geevn en verklêent z'n doelbereik ôok deurda olles achter de keeper ol nie mè te bereikn is. An de keeper en den anvaller ton elkoar uuteindelik treffn smyt de keeper em oltyd nere, zodat den anvaller zeker den bol nie onder em kan schietn en steektn z'n êne arme in de lucht vo moest den anvaller doa schietn en êne arme noar rechts of noa links afankelik van van wukne kant den anvaller komt. Den anvaller zyn kansn zyn ton hêel wa kleinder woardeure dat den anvaller ollêne nog moa kan probeern den bol ergens deur te schippn of een lobke te probeern. 't Gebeurt wel ne kêe deurda den anvaller en keeper zo zêre lôopn en mekoar roakn, da den keeper ne kwoalike slag krygt en moe ofgevoerd weirn mè nen brancard.

De keeper is nie verplicht om in ze golle of in de carré te bluuvn gelik da sommigte minsn wel peizn. Keepers kommn uut vo verder te kunn uutschietn of vo mee te goan in den aanval at et team echt moe winn in ne finalewedstryd, vo azô dus ne man mêer t' èin. Ip de latste minuutn van finales goan keepers ôok af en toe e kê mee omda zyder ôok vele grôot van gestalte zyn en dus beter zyn vo te koppn. Vroeger, (mêer of nu) schootn keepers mêestal de penalty's. Nu weirdt da verre allêne nog gedoan by verlengiengn die endign ip penalty's en at die êne ploeg al vôorstoat om et nog schonder te moakn. Kinders spreekn wel ne kê van "vliegende keeper" a ze bedoeln da de keeper mee uut komt, omda z' anders mè te winnig zyn vo echt voetbol te speeln. 't Is ton nie toegeloatn as t' ander team den bol èit gepakt da ze van 'n êeste kê noa de golle schietn at er (nog) niemand in stoat.

• Geert De Vlieger, vele joarn êeste keeper van de Rôo Duvels gewist
• Christian Piot, keeper van '69 tot '77 vo de Rôo Duvels. Je speelde hêel zyn carrière vo Luuk. In '72 wont 'n de Goudn Schoe.
• Jean-Marie Pfaff, zeker de bekendste en beste keeper van België en beste keeper van de weireld in de joarn '80, verre zeker ôok de bekendste voetbolspeler van België over hêel de weireld en misschien wel de bekende sporter van België over hêel de weireld. J'is gestart in Beveren by Antwerpn en hèt lange by Bayern München gespeeld.
• Michel Preud'homme, de man die zorgde da KV Mechelen in '87 de Belgische beker, de Europacup en de UEFA Super Cup won. In '89 wonn z'ôok de Jupiler League. In 2006-2008 wast ie hoofdcoach van Standard en zorgde ie ervôorn da zyder wonn. Vo 2008-2009 ist ie den coach van AA Gent.
• Stijn Stijnen, êeste keeper van Club Brugge en van de Rôo Duvels
• Dany Verlinden, vele joarn êeste keeper van Club Brugge gewist, nu keepertrainer van Brugge en gemeenteroadslid vo Open VLD in Koksyde. J'ad de gepaste bynoame de meur.
• Thibaut Courtois, êeste keeper Atletico Madrid en van de Rôo Duvels.

• 
  Jean-Marie Pfaff
• 
  Michel Preud'homme

• Gianluigi Buffon, momenteel beschouwd als beste keeper ter weireld en keeper van et voetbolelftal van Itoalië.
• Iker Casillias, poar joar de beste keeper van de weireld en ôok de keeper van den Spoansche nationoale ploeg.
• Petr Čech, keeper van Chelsea en keeper van de Tsjechische nationoale ploeg.
• Dida (volledige noame: Nélson de Jesús Silva), ênigte joarn êeste keeper van de Braziloanse nationoale ploeg en keeper van AC Milan.
• Oliver Kahn, van 1995 tot 2005 vaste keeper van Bayern en den Duutse nationoale ploeg.
• Edwin van der Sar, keeper van Manchester United en keeper van Holland op 't WK in Duutsland in 2006
• Dino Zoff, Italioanse keeper die keepte vo ounder andre: Mantova, Napoli en Juventus. By Juventus èit 'n 11 seizoenn lang gekeept (as êeste keeper) woavan dat 'n gin êen èit gemist en Juventus noa sucessn geleid èit. J' èit ôok 112 kêes uutgekommn vo 't Italioans elftal. At 'n stopte wos 't ie een ende keeper trainer vo Juventus, loater jeugdtrainer vo Itoalië, in 1998 werd ie bondscoach van Itoalië en leidde under ip et EK in 2000 noa de finoale. Doarachter gingt 'n (were) an de slag by Lazio Roma.

• 
  Oliver Kahn
• 
  Iker Casillias
• 
  Dida

• 
  Buffon
• 
  Edwin van der Sar
• 
  Petr Čech