Trubčevsk

Trubčevsk
Трубчевск

Lidnanznam
Valdkund	Venäma
Eläjiden lugu (2021)	13,287 ristitud
Pind	14 km²
Pämez'	Nikolai Dančenko (reduku 2012—)
Telefonkod	+7−48 352-xx-xxx
Avtokod	32
Aigvö	UTC+3 (MSK+0)

Trubčevsk (ven.: Трубче́вск) om Venäman lidn da lidnankund Bränskan agjan suves. Se om Trubčevskan rajonan administrativine keskuz.

Eländpunktan aluz om pandud vl 975 kuti Trubeč, Trubež, Trubeck, Trubežsk vai Trubčesk (erazvuiččiden purtkiden mödhe) lidnan statusanke Desnan randal kümnes kilometras mödvedhe. 12. voz'sadaspäi lidn seižub nügüdläižel sijal. Vozil 1164−1566 Trubčevsk oli ühtennimižen ruhtinazkundan keskuseks, sid' Pol'šanman i Venäman röunanverižeks lidnuseks.

Trubčevsk šingotase mašiništonsauvomižen «Monolit»-tegimel (ambundavialadlused, elektroavtomatik, cisternad, mebel'), sömtegimištol (leib, sagud, lihaproduktad), kazmuzhonusiden tegimel.

Lidn sijadase Desn-jogen randal (Dnepran bassein), 170 m ü.m.t. keskmäižel korktusel.

Matkad Bränskhasai om 94 km pohjoižhe, Ukrainan röunhasai — 25 km suvhe. Lähembaine lidn om Počep 44 km lodeheze orhal vai 52 km avtotedme.

Trubčevsk om lidnankundan üks'jäižeks eländpunktaks.

Lidnankundan tobmuden pämez' om sen Rahvahandeputatoiden nevondkundan ezimez'. Lidnan erigoittud Administracii radoi vll 2006−2015, Nikolai Dančenko likvidirui sidä vn 2015 heinkus-tal'vkus.

Vn 2010 Venäman rahvahanlugemižen mödhe lidnan eläjiden lugu oli 15 014 ristitud, rajonan kaks' videndest, vn 2021 — 13 287 ristitud. Kaik 13 696 eläjad oli lidnas vl 2017. Kaikiš suremb lidnan ristitišt oli 17 700 eläjad vl 1998.

Ortodoksižen hristanuskondan kuz' pühäpertid^[1] oma kaičenus i saudud lidnas: Eläban Eziauguižen Stroican päjumalanpert' (letihe vspäi 1784), nell' jumalanpertid i časoun'. Niiden ližaks kaks' jumalanpertid ei ole kaičenus.

Lapsiden opendusen aluzkundad oma severz'-se päivkodid, kaks' keskškolad (nomer 1 i 2), gimnazii M.T. Kalašnikovan nimed, čomamahtoiden škol, sportškol. Trubčevskan politehnine tehnikum^[2], agrarine kolledž^[3] (Bränskan valdkundaližen agrarižen universitetan filial) i professionaliž-pedagogine kolledž^[4] oma lidnan professionaližen opendusen aluzkundoikš. Avtomehanine tehnikum radoi vn 2016 sügüz'kuhusai, mülütihe sidä politehnižhe tehnikumha.

• 
  Lidnan amuine Suimiden mägi Desnan oiktal randal (2021)
• 
  Eläban Eziauguižen Stroican päjumalanpert', vn 2012 nägu
• 
  Illä-endustajan jumalanpert', vn 2012 nägu
• 
  Lämoipalonvastaižen palakundan čuhunduz vl 2008
• 
  Lidnan muzei vl 2015

1. ↑ Trubčevskan pühäpertid sobory.ru-saital. (ven.)
2. ↑ Trubčevskan politehnižen tehnikuman sait (trpoliteh.ru). (ven.)
3. ↑ Trubčevskan agrarine kolledž Bränskan valdkundaližen agrarižen universitetan bgsha.com-saital. (ven.)
4. ↑ Trubčevskan professionaliž-pedagogižen kolledžan sait (tppk32.ru). (ven.)

• Trubčevsk-lidnan da Trubčevskan rajonan administracijan oficialine sait (trubech.ru). (ven.)

Trubčevsk Vikiaitas