Počep

Počep
Почеп

Lidnanznam
Valdkund	Venäma
Eläjiden lugu (2021)	14,991 ristitud
Pind	19,93 km²
Telefonkod	+7−48 345-xx-xxx
Avtokod	32
Aigvö	UTC+3 (MSK+0)

Počep (ven.: По́чеп) om Venäman lidn da lidnankund Bränskan agjan keskuzpalas. Se om Počepan rajonan administrativine keskuz.

Eländpunkt mainitase ezmäižen kerdan vl 1447^[1]. Oli lidnuseks 16.-17. voz'sadal, sen mapudotesed oma kaičenus lidnanno tähäsai. Žilo sai lidnan statusad vl 1925. Vozil 1941 (22. eloku) — 1943 (21. sügüz'ku) se oli okkupiruidud nacistižen Germanijan sodavägil, tehtihe sijaližiden evrejalaižiden rikondad — 1800 ristitud. Ei ole himižen azegišton varoid lidnan ümbrištos (ende Venäman kudendez oli), likvidiruihe niid täuzin.

Počepan ižandusen päsarakod oma sömtegimišt (pästtas leibäd, maidod, void, kanaproduktoid) i mecan ümbriradmine, mugažo omblendfabrik^[2] om saudud.

Lidn sijadase Sudost'-jogen randoil (ven.: Су́дость 208 km pitte, Desnan oiged ližajogi), 150 m ü.m.t. keskmäižel korktusel. Matkad Bränskhasai om 84 km pohjoižpäivnouzmha avtotedme vai raudtedme. Lähembaižed lidnad (avtotedme) oma Trubčevsk 51 km suvipäivnouzmha, Uneč 64 km päivlaskmha i Mglin 48 km lodeheze.

Počep om lidnankundan üks'jäine eländpunkt.

Vn 2010 Venäman rahvahanlugemižen mödhe lidnan eläjiden lugu oli 17 161 ristitud, rajonan nell' ühesandest. Kaik 16 663 eläjad oli lidnas vl 2017. Kaikiš suremb lidnan ristitišt oli 18 200 eläjad vozil 1998−2001.

Ortodoksižen hristanuskondan seičeme pühäpertid^[3] oma saudud lidnas: Sündun Eläbzdusen päjumalanpert' (letihe vll 1765−1771), nell' jumalanpertid i kaks' časounäd. Niiden ližaks koume jumalanpertid ei ole kaičenus.

Kaik om koume keskškolad i gimnazii, čomamahtoiden škol i sportškol lapsiden täht. Počepan mehaniž-agrarine tehnikum^[4] om lidnan professionaližen opendusen aluzkundaks.

«Bränsk — Gomel'»-mante läbitab lidnan suvipalad.

Počep-raudtestancii radab lidnas vspäi 1887 «Bränsk — Gomel'»-jonol.

• 
  Počtan sauvuz (2017)
• 
  Sündun Eläbzdusen päjumalanpert', vn 2012 nägu
• 
  Illä-endustajan jumalanpert', vn 2013 nägu
• 
  Lapsiden kirjišt (2013, ende Kirila Razumovskijan pert'kulu)
• 
  Počep-raudtestancii vl 2005

1. ↑ «Пану Захари Почапъ, а Сетолоска, а Бобынина земля, а Шумърома; у вотъчину. Инъдик[тъ] 10. Панъ Монивидъ». // Литовская метрика (Litvanman aigkirj). T. I. — Piter, 1910. — Lp. 48. (ven.)
2. ↑ Počepan omblendfabrikan nadezhda-stil.inni.info-lehtpol'. (ven.)
3. ↑ Počepan pühäpertid sobory.ru-saital. (ven.)
4. ↑ Počepan mehaniž-agrarižen tehnikuman sait (pocheptechn.ucoz.ru). (ven.)

• Počep-lidnan da sen rajonan tobmuden sait (admpochep.ru). (ven.)
• Počepan kodirandantedištandmuzei Branskan valdkundaližen kodirandantedištandmuzejan bgkm.ru-saital. (ven.)

Počep Vikiaitas