Novozibkov

Novozibkov
Новозыбков

Lidnanznam	Flag
Valdkund	Venäma
Eläjiden lugu (2021)	38,680 ristitud
Pind	31,5 km²
Pämez'	Aleksandr Ščipakin (kül'mku 2019—)
Telefonkod	+7−48 343-xx-xxx
Avtokod	32
Aigvö	UTC+3 (MSK+0)

Novozibkov (ven.: Новозы́бков) om Venäman lidn da lidnümbrik Bränskan agjan suvipäivlaskmas. Se om agjan koumanz' surtte lidn, mugažo om Novozibkovan rajonan administrativižeks keskuseks (ei mülü sihe).

Eländpunktan aluz om pandud vl 1701 kuti sirdanuziden Venäman keskuzregionoišpäi vanhuskolaižiden Zibkai-slabad (ven.: слобода Зыбкая). Se sai lidnan statusad vl 1809 nügüdläiženke nimenke.

Novozibkov om openduzkeskuseks, šingotase elektrotermižen mašiništon pästandal (suladuzpäčid, ühthekeitandapparatad), nahkan i tekstilin edheotandoil, sömtegimištol, mugažo betonližadusiden tegim radab. Ende tehtihe jüguzvagonoid i virid mugažo.

Lidn sijadase 160 m ü.m.t. keskmäižel korktusel. Matkad Bränskhasai om 207 km pohjoižpäivnouzmha, Vaugedvenämahasai — 25 km päivlaskmha orhal. Lähembaižed lidnad oma Klincad 35 km pohjoižpäivnouzmha orhal i Zlink 25 km suvipäivlaskmha orhal. Ühtennimine raudtestancii om olmas «Bränsk — Gomel'»-jonol vspäi 1887.

Novozibkov om lidnümbrikon üks'jäižeks eländpunktaks.

Vn 2010 Venäman rahvahanlugemižen mödhe lidnan eläjiden lugu oli 40 553 ristitud. Kaik 40 476 eläjad oli lidnas vl 2017. Kaikiš suremb lidnan ristitišt oli 47 tuhad eläjid vozil 1985−1988.

Ortodoksižen hristanuskondan ühesa pühäpertid^[1] oma avaitud lidnas: Mikoi-arhangelan čudon päjumalanpert' (saudihe vll 1867−1898), Spasan Toižetamižen päjumalanpert' (vanhuskolaižiden, om letud vll 1911−1914), nell' jumalanpertid i koume časounäd. Niiden ližaks koumen jumalanpertid sauvused kävutasoiš toižin i koume jumalanpertid ei ole kaičenus.

Vozil 1963−2002 Venäman amuižortodoksižen jumalankodikundan keskuz sijazihe lidnas, sid' keskusen sirtihe Moskvha da kätihe patriarhataks.

Novozibkovan professionaliž-pedagogine kolledž^[2], medicinine kolledž^[3], maižanduztehnikum^[4] (Bränskan valdkundaližen agrarižen universitetan filial) i Bränskan energomašinansauvomižen da radioelektronikan tehnikuman filial^[5] oma lidnan professionaližen opendusen aluzkundoikš.

Lidnan Rahvahandeputatoiden nevondkundan ezimez' om lidnümbrikon pämez'. Edeline lidnan pämez' om Aleksandr Matvejenko (viluku 2014 — kül'mku 2019). Lidnümbrikon Administracijan pämez' om Aleksandr Grek vn 2022 kül'mkuspäi.

• 
  Mikoi-arhangelan čudon päjumalanpert', vn 2021 nägu
• 
  Spasan Toižetamižen jumalanpert' (vanhuskolaižiden), vn 2013 nägu
• 
  Kul'turkeskuz (2015)
• 
  Novozibkov-raudtestancii vl 2017 vai sen aigemba

1. ↑ Novozibkovan pühäpertid sobory.ru-saital. (ven.)
2. ↑ Novozibkovan professionaliž-pedagogižen kolledžan sait (npedkol.ru). (ven.)
3. ↑ Novozibkovan medkolledžan sait (novomk.ru). (ven.)
4. ↑ Novozibkovan maižanduztehnikum Bränskan valdkundaližen agrarižen universitetan bgsha.com-saital. (ven.)
5. ↑ Novozibkovan filial Bränskan energomašinansauvomižen da radioelektronikan tehnikuman novpromteh.ru-saital. (ven.)

• Lidnümbrikon Rahvahandeputatoiden nevondkundan sait (sovet-nvz.ru). (ven.)
• Lidnan Administracijan oficialine sait (zibkoe.ru). (ven.)
• Lidnan informacine novozybkov.ru-portal. (ven.)

Novozibkov Vikiaitas