Sistema nervoso

El sistema nervoso xe l'insieme dei òrgani formai da tessudo nervoso, o sia da neuroni, sèlule gliali e le conbinasion de sti elementi, che le querze le funsion de métare in comunicasion quelo che sta fora dal drento del corpo e anca le parte interne in intrà lore. Le resposte omeostàtiche varentae da la funsion nervosa le se destingue da quele de altri sistemi, come quelo endòcrino, prima de tuto par la velossità del'adatamento prodoto dal'ativasion de sti tessudi, ma anca par el sterminà grado potensiale de conplessità del'intregasion del segnale. Par sta rezon, a le struture nervose, in particolare quele del sarvelo, xe tribuia la generasion de fenòmeni de difissile interpretasion propi de organismi conplessi come l'omo e alcune gnanca solo, come cossiensa, memoria, tension, sòno e veja, emossion, pensiero e tanti altri. L'organizasion anatòmega del sistema nervoso la destingue:

• sistema nervoso sentrale (SNC, anca ciamà nevrasse), par definision costituio da:
  • encèfalo, contegnuo inte la scàtola crànica e a so volta diviso in:
    • servelo (o sarvelo, zervel)
    • serveleto (o sarveleto, zerveleto)
    • tronco encefàlico
  • megola spinale, contegnua in te'l canale vertebrale
• 'sistema nervoso perifèrico (SNP) che el xe definio dai òrgani che, dopo un trato drento, i salta fora da le protesion schelètrica del SNC, e i xe:
  • gangli
  • nervi, che vissin al SNC i se organiza in plessi e raise

Sia el sistema nervoso sentrale che quelo perifèrico i xe fati in gran parte de tessudo nervoso, drento al quale se cata na destinsion fondamentale. La sostansa griza la xe conposta dai corpi selulari dei neuroni e dai so (in prevalensa) astrociti de sostegno e la toe el so nome dal fato che xe più vascolarizada (dopo qualche dì dal tajo el rosa orizenale deventa de sto color): in te'l SNC se cata in struture dite scorse, nùclei (encèfalo) e corni (megola spinale), in te'l SNP la costituisse i gangli. La sostansa bianca, invesse, xe ciamada cussì par via de la mielina, sostansa lipìdica che la proteze i assoni dei neuroni sia del SNC, dove xe formada dai oligodendrociti, sia del SNP, dove xe formada da le sèlule de Schwann: le formasion de sostansa bianca le vien ciamade vie o fassi (càpsule e lemnischi in te'l encèfalo; cordoni inte la megola spinale) in te'l SNC, mentre in te'l SNP le forma i nervi. I oligodendrociti i xe propi del SNC, mentre le sèlule de Schwann del SNP: l'ùgnola ecesion xe rapresentada dal secondo paro de nervi crànici (i nervi òtici) che par convension anatòmega i vien considarai perifèrissi, anca se. a tuti i efeti, i xe na protrusion del sistema nervoso sentrale verso la rètina del'ocio, gavendo drento oligodendrociti.

Vien considarae parte del sistema nervoso tessudi conetivi de sostegno al tessudo nervoso: in te'l SNC gavemo le meninge (stratificae in dura mare, aracnoide e pia mare, ndando da fora a drento), in te'l SNP ghe xe epinevrio, perinevrio e endonevrio. Mentre el tessudo nervoso l'orìzena dal'epitelio enbrionale del'ectoderma, i conetivi i salta fora dal mesoderma.

Dal ponto de vista funsionale ma anca anatòmego, el sistema nervoso, sentrale come perifèrico, se divide in:

• sistema nervoso somàtico o volontario (SNS), che el controla le struture de suporto come i arti e le paredi de le cavità corpòree, donca pele, fasse, ossi, articolassion, mùscoli, ecc.
• sistema nervoso vegetativo o autònomo o visserale (SNV o SNA), che el controla le funsion vidali ligade ai vìsseri (overo i òrgani interni) conpagno al sistema endòcrino e'l xe fato da:
  • sistema nervoso ortosinpàtico' (o solo sinpàtico')
  • sistema nervoso parasinpàtico'
  • sistema nervoso entèrico', st'ultimo descrito da manco tenpo, controlà dai do de prima, ma anca autònomo par funsionamento.

Ogni parte del sistema nervoso la ga come schema de strutura e funsionamento de base:

• na rama sensitiva o aferente o assendente: terminasion nervose lìbare o coligade a recetori specializai le tole su un segnale, o sia na variasion energètica de qualsiasi tipo (fìsica, chìmica, ecc.) del'anbiente intorno, e ela converte in un potensiale elètrico che el sale su par el nervo.
• na parte intregativa più o manco conplessa fata de neuroni messi in mezo e le so sinapsi.
• na rama motoria o eferente o dessendente che la produze la resposta: l'esenpio più sénpleze da pensare xe un mùscolo che el se contrae o relassa, ma anca i movimenti de muscoladura lissa o le giàndole che le buta fora o drento al corpo na secression.