Asteroide

On asteròide el xe un corpo rocioso, carbonàxeo o metàłico pi picenin de un pianeta e chel òrbita torno del Sol, inte na òrbita interior a queła de Netun. Da ła Tera i asteroidi i ga n'aspeto de stełe, e donca da chi el nome de asteroidi (ἀστεροειδής in greco a significa "de figura de steła"), termino dà da John Herschel poco daspó de i primi descoerximenti. I asteroidi i se ciama anca pianetoidi o pianeti minori. Ste últime denominasion łe include, soralconto, i corpi de jaso e quełi chei ga na òrbita pi in fora de Netun.

Asteroidi tanto cei (in zenere framenti derivà da cołizion), con łe dimension de un maso o anca manco (secondo l'Union Astronomega Internasionałe, corpi de masa conpresa intrà 10⁻⁹ e 10⁷ kg), i ze conosiuti come "meteoroidi". I asteroidi conposti par ła maior parte di giaso i ze conosiui invece come comete. Alcuni asteroidi i ze el residuo de vecie comete, che e ga perso el loro jaso inte el corso de ripetui avisinamenti al Sołe, e i ze deso conposti par lo pi de rocia.

Se pensa che i asteroidi i sia i residui del disco protoplanetario che no i ze sta incorporai nei altri pianeti, durante ła formazion del sistema.

I ga de frecuente orbite caraterizae da na ełevada esentrisità. Ła majoría de i asteroidi che i se cata intel nostro Sistema Sołar, i ga òrbite semi-stabiłi intrà Marte e Xove, paró coalchedun el xe desvià a òrbite che łe se incroxa co quełe de i pianeti pi grandi.

El 1 de zenaro 1801 el astrònomo sixiłian Bepe Piazzi, el ga descoerto el asteroide o pianeta minor, (1) Cerere, mentre el gera drio laorar a un catàlogo de stełe. Sto pianeta minor el xe stà ciamà Cerere Ferdinandea in onor del re de łe do Siciłie de chel tenpo, Fernando I.

A ła descoerta de Piazzi łe ne va drio altre conpagne, paró de ogeti pi picenini. Ancuo stimemo che łe esista sirca 2 miłoni de asteroidi co un diàmetro major de 1 km soło intel Sinturon Prinsipal de asteroidi; ghe xe da dire che se somemo tuta ła so masa, el total el xe el 5% de ła masa de ła łuna.

Da ła redefinision de pianeta del 2006 portà caxa da ła Union Astronòmega Internasional, el tèrmino clàsico asteroide nol sparise, parò el se cata inglobà rento de i denominà corpi minori del Sistema Sołar (eceto (1) Cerere, chel se consìdera pianeta nano), insieme co łe comete, la majoransa de i ogeti transnetuniani e coalsevoja altro sòłido chel orbita torno del Sol e el sìpia pi picenin de un pianeta nano.

Ła major parte de i asteroidi conozesti łi gira intel spasio in n'agrupasion che ła se conoze co el nome de Sinturon de asteroidi, chel se cata intrà Marte e Xove. Sto Sinturon el xe a na distansa del Sołe cronprexa intrà 2 e 3,5 UA. Sti asteroidi i va torno el Sołe in òrbite co intervało intrà 3 e 6 ani.

El 22 de agosto 2006, [1) Cerere, el xe stà reclasificà cofà pianeta nano come Plutone e Eris.

Par savèrghene de pì, vardarse anca ła voze Lista de asteroidi.

• Wikimedia Commons el detien imàjini o altri file so asteròide
• Scholia el detien schemi gràfeghi so Asteroide